# परस
तो : दाटतो आहे कोवळा अंधार
ती : किलकिले परसाचे सोवळे दार
ती : ध्यानी-मनी तुझाच विचार
तो : अन अंगात फुलला प्रीतिचा अंगार
तो : मन माझे ही सैरभैर
ती : वाट पाहते करुनी सोळा-शृंगार
तो : आतुरलेली तुझ्या घराकडली पाउलवाट
ती : आसुसलेल्या मनाने मीलनाचा घातला घाट
तो : हिरव्या बिछान्यावर गात्र अंथरावे
ती : गडद निळ्या आकाशाची चांदरात पांघरावी
तो : चंद्र हा पुनवेचा हळूच डोकवतो कसा
ती : नारळी-पोफळीलाच लागलाय जसा
ती : तुझ्या प्रेम सरीनी माझे सारे अंग भिजावे
तो : ओल्या केसांत तुझ्या हे मन वेडे व्हावे
तो : या प्रणयास पहा केळ ही कशी लवून बघते
ती : सोनचाफ्याचे झाड परी गालातच हसते
तो : डोळ्यात पहाता हरवूनी जावे
ती : तुझ्या मिठीत निर्धास्त निजावे
ती : उमलते अबोली अशी जणू नववधू लाजते
तो : रातराणीची जादू सा-या परसात संचारते
ती : तुझ्या स्पर्शाने गो-या गालांवर लाली चढे
तो : क्षण हा हवासा वाटुनही किती घेतेस आढे-वेढे
तो : तव मधुमिलनाचा पारिजातकांसही लोभ जडे
ती : अन पहाटे-पहाटे टपोर फुलांचा सडा पडे
©मनमित 2021
........
No comments:
Post a Comment